Tanzania Leo

  MAJAMBAZI WAPORA KITUO CHA MAFUTA NA KUTOROKA NA BUNDUKI.

JESHI la polisi mkoani Kilimanjaro linawasaka watu 10 wanaotuhumiwa kuhusika katika tukio la ujambazi lililotokea usiku wa kuamkia jana na katika kituo cha mafuta cha msaranga kilichopo katika maeneo ya mbwaruki kata ya kiboroloni, wilaya ya moshi, mkoani Kilimanjaro na kuondoka na bunduki aina ya Shot gun namba 67189.

Akitoa taarifa kwa vyombo vya habari, kaimu kamanda wa polisi mkoani Kilimanjaro Yusuph Ilembo, alisema kwamba majambazi hao walimvamia mlinzi wa kituo hicho aitwaye Salvatory Peter Ngowi wakiwa na mapanga, marungu na nondo na kumjeruhi kwa kumkata kichwani usoni na mikononi kasha kuondoka n asilaha yake aina ya shotgun pamoja na pesa za mauzo ambazo hata hivyo kiasi chao hakijatambulika.

Kamanda Ilembo alisema kwamba baada ya kupora bunduki hiyo ambayo ilikuwa na risasi mbili na fedha hizo majambazi hao walitokomea kusikojulikana .

 “tulipata taarifa za ujambazi katika kituo cha mafuta cha msaranga kwamba mlinzi wa kituo hicho amevamiwa na watu wapatao kumi, majira ya saa 2 usiku, tukio lililotokea katika maeneo ya mbwaruki kiboroloni na tulipofika tayari majambazi hao walikuwa wameshaondoka katika eneo la tukio na kulingana na maelezo ya mlinzi wa kituo hicho bwana salvatory peter ngowi, watu hao walimvamia na kumpokonya bunduki yake aina ya shotgun No.67189 ikiwa na risasi mbili pamoja na fedha za mauzo ambazo hata hivyo idadi yake haijafahamika bado,’ alisema Ilembo.

Kutokana na kuwepo kwa matukio kama hayo katika siku za hivi karibuni hususan katika eneo hilo la mbwaruki, kamanda Ilembo alitoa wito kwa wafanyabiashara hasa wamiliki wa vituo vya kuuza mafuta kuhakikisha vituo vyao vinakuwa na sehemu ya kuhifadhiia pesa iliyojengwa imara na kuongeza kama hayo yatafanyika ikiwa ni pamoja na kuongeza umakini wawapo kazini basi matukio kama hayo yatatokomezwa mkaoni hapo.

Aidha alisema jeshi la polisi mkoani Kilimanjaro linaendelea na msako mkali kuhakikisha watuhumiwa hao wanakamatwa na kuongeza kuwa jeshi linatoa wito kwa wananchi kutoa ripoti maramoja kwa polisi wawaonapo watu wanaowatilia mashaka. .